Die bal is aan die rol by Vrye Weekblad

Die bal is aan die rol by Vrye Weekblad

Nuusbrief: 27 Februarie 2019

  • 27 Februarie 2019
  • Bulletins
  • 3 min om te lees


Goeiedag van die span by VryeWeekblad.com.
Welkom, en dankie dat jy met jou e-posadres geregistreer het. Tot en met ons afskopdatum in April sal ons gereeld met jou kommunikeer. Ons is sterk aan die voorberei vir die eerste klompie uitgawes. Ons gaan nie gewone nuusjoernalistiek pleeg nie, so die meeste artikels vat nogal tyd om na te vors en te skryf. Ons is baie ambisieus om elke Vrydag ’n publikasie van internasionale gehalte aan te bied. Ons het die bal aan die rol gesit met ’n hele klomp ondersoeke en agtergrond-artikels. Ons voel-voel maar nog oor watter pad ons moet loop, want iets soos VryeWeekblad.com is nog nie in Afrikaans of in Suid-Afrika gedoen nie.
Ons sal graag jou insette wil hoor – watter soort artikels, watter soort aanslag, watter onderwerpe en enige idees oor wat jy graag in die publikasie wil sien. E-pos dit asseblief aan redaksie@vryeweekblad.com. ’n Bietjie agtergrond. VryeWeekblad.com word deur die Tiso Blackstar-groep, uitgewers van Business Day, Sunday Times, Financial Mail en Sowetan, uitgegee. Dit beteken hulle verskaf en bestuur die digitale platform en finansier die hele projek. Ons val egter nie onder hul redaksionele beheer nie – ons besit self die handelsmerk, ons deel nie kantore met hulle nie en ons redaksionele vryheid is in ons publikasie-ooreenkoms ingesement.
Ons model is ’n baie soepel een. Ons het voorlopig net drie redaksielede: Max du Preez, Jacques Pauw en Anneliese Burgess, terwyl Adri Kotze ons in Europa verteenwoordig. Dit beteken ons kan elke week ’n groep kenners, spesialiste, meningsvormers, ontleders en ondersoekers vra om spesifieke artikels te doen. Dit waarborg ’n goeie sirkulasie van stemme eerder as dieselfde bydraers elke week en dit beteken ons kan uit die beste talent kies en keur.
Ons wil nie net die vlak van joernalistiek in ons gemeenskap help lig nie. Ons wil ook lesers in ’n baie verwarrende, deurmekaar tyd en omgewing help om sin van die wêreld om hulle te maak deur die groot (en kleiner) vrae te vra en dan antwoorde te soek. Ons wil bo die rookmis uitstyg en los staan van drukgroepe, politieke partye, sakebelange of ideologieë. Ons gaan ’n wye verskeidenheid stemme en menings publiseer en die leser self vra om sy/haar mening te vorm. Ons hoop ook om te help om die Afrikaanssprekende gemeenskap(pe) se gevoel van verwydering van die res van die nasie en ’n groeiende gevoel van slagofferskap aan te spreek – nes die aanvanklike Vrye Weekblad wou doen.
Afrikaanssprekendes is eersteklas-burgers nes alle ander, en Afrikaans is ’n inheemse taal nes die ander nege. Ons sê prontuit dat ons ’n progressiewe publikasie is. Die woord kan natuurlik op verskeie maniere geïnterpreteer word, maar wat ons daarmee bedoel is dat ons in beginsel teen onverdraagsaamheid, rassisme, etniese chauvinisme, rasmobilisering, seksisme en homofobie gekant is; dat ons ’n nie-rassige demokrasie soos vervat in ons grondwet steun; dat ons glo in vrye spraak en ’n oop gemeenskap; en dat ons ons vir ’n regverdige samelewing beywer.
Ons gaan heelwat energie en hulpbronne aan ondersoekende joernalistiek bestee en ons beste doen om diegene in mag verantwoordbaar te hou. Maar ons gaan ook oor gesondheid, tegnologie en wetenskap skryf; oor kos en boeke, kultuur en reis. Ons wil graag sien dat VryeWeekblad.com elke Vrydag en oor die naweek ure se nuttige leesgenot aan ons lesers bied – en ons hoop ons gaan dit met goeie skryfwerk, aanbieding en ontwerp doen.
’n Guns, asseblief: stuur tog hierdie bulletin aan jou vriende en vra hulle om by VryeWeekblad.com te registreer sodat ons teen 5 April ’n goeie databasis van e-posse het aan wie ons die eerste uitgawes kan stuur. Ons gesels binnekort verder.

Registreer gratis om hierdie artikel te lees.

Die meeste van ons artikels is slegs vir ons intekenaars, maar hierdie een is gratis solank jy registreer.

Reeds geregistreer? Kliek “Meld aan” om voort te gaan

Vrae of probleme?
E-pos hulp@vryeweekblad.com of skakel 0860 52 52 00.

X