SA boere help in Mosambiek – en wat van troeteldiere na die ...

BULLETIN

SA boere help in Mosambiek – en wat van troeteldiere na die Wegraping?

Nuusbulletin: 17 April 2019


Goeiemôre
Ons kom nou lekker in ons ritme met ons daaglikse geselsies. In die middel van elke week stuur ons vir julle ’n paar lekker stories wat die span raak gelees het op die internet. Hiermee dan ons Woensdag-leeslys:
Suid-Afrikaanse boere maak ’n plan in Mosambiek
Die 52-jarige Ibrahim Ishmail het al in sy tien jaar as voorman van ’n mangoplaas in Matarara in Mosambiek se Dombe-distrik geleer om reg te kom met watter hulpbronne ookal beskikbaar is.
So het hy en die plaasbestuurder, Gilles van de Waal (56), ná die vloede in Mosambiek ’n vlot uit vier polistireenpanele – van die plaas se koelkamer – en ’n bamboesstok gemaak om mense uit bome en die vloedwaters te gaan red. Hulle het meer as 20 mense in veiligheid gebring voordat ’n boot gekom het om by hulle oor te neem.
Mike Scott, die plaaseienaar, het so gou hy kon uit Hoedspruit by die plaas uitgekom sodat hulle ’n beheersentrum kon inrig. Daar aangekom was daar reeds ander Suid-Afrikaners uit die distrik wat kom help het. Die onmiddellike behoefte was aan kos, mediese voorrade en muskietnette. Een van die boere kon kontak maak met ’n hulporganisasie in Beira wat kom help het.
World Food Programme het kos en noodsaaklike voorrade by Scott se plaas afgelewer en met behulp van Mercy Air se helikopter het hulle die voorrade aan die omliggende dorpies versprei.
Nog ’n Suid-Afrikaanse boer, Kobus Botha, wat in Rwanda en by die vorige vloede in Mosambiek gehelp het, sê die grootste probleem was malaria en die muskietnette het nog nie gekom nie. Die ding van ’n vloed is, jy moet onmiddellik reageer. “Daar is nie tyd om rond te sit en te evalueer nie. Ons klein operasietjie was in staat om onmiddellik mense te help. Net van donasies van boere wat op ons WhatsApp-groep is, het ons hier aangekom met potte en panne en kos om die mense te help. Groot organisasies laai die voorrade eers af in store.”
Scott vertel hulle het meer as 100 ton voedsel en ander voorrade aan die 1,465 gesinne gelewer. “Maar wat ons ook vir die boere van Mosambiek sal nodig hê, is om ’n saadprogram te begin.” Hy sê as saad aan plaaslike boere verskaf kan word, kan baie van hulle in April begin plant en sommige gewasse sal in Junie gereed wees.”
>> LEES MEER
Hou die wortel-en-stok metode China se enorme bevolking in toom?
Teen 2020 sal China se “sosiale kredietstelsel” – wat in 2014 bekend gemaak is – ten volle geïmplementeer wees. Presies hoe dit gaan werk, is ’n geheim, maar wees verseker, ouboet hou jou fyn dop.
Voorbeelde van oortredings is om sleg te bestuur, om in nie-rookgebiede te rook, te veel videospeletjies te koop, om geld op ligsinnige aankope te mors en om fopnuus te versprei. Die stelsel monitor natuurlik ook laatbetalers en bedrog.
Punte kan afgetrek word as jou hond sonder ’n leiband laat loop of aan openbare wangedrag skuldig is. Verloor al jou punte en jou hond word gekonfiskeer.
Die stelsel is nie net ’n strafmeganisme nie; goeie burgers word ook beloon.
Nege miljoen mense met lae tellings kan nie meer kaartjies vir binnelandse vlugte koop nie en drie miljoen kan nie besigheidsklas-treinkaartjies koop nie. As jou internetspoed drasties afneem, kan jy maar weet jy het gesondig.
Die stelsel is beslis ook ontwerp om verleentheid te veroorsaak. In Julie verlede jaar het ’n Chinese universiteit ’n student geskors omdat sy pa ’n slegte sosiale gradering het. Jy kan ook toegang tot sekere hotelle en vakansieoorde geweier word.
Mense met goeie tellings word beloon met vinniger toegang tot reisdokumente en hulle hoef nie deposito’s te betaal wanneer hulle hotelbesprekings doen nie.
>>LEES MEER
Troeteldierversorging ná die Wegraping
In die Bybel beskryf die apostel Paulus die Wegraping, waar Jesus die Christene op die aarde sal kom haal en saam met hom terug hemel toe sal neem. Maar sommige Christene in Amerika het begin wonder wat van die troeteldiere sal word wat agterbly. Hulle het met die volgende oplossing vorendag gekom.
>> LEES MEER
Is die vertoon van die ou Suid-Afrikaanse vlag ’n vorm van haatspraak?
Die Gelykheidshof sal die einde van hierdie maand besluit.
Kommer dat mense wat die ou Suid-Afrikaanse vlag vertoon nie begrip het vir die impak van apartheid en die pogings om die land te verenig nie, het die Nelson Mandela-stigting genoop om die Gelykheidshof te vra om die gebruik van die vlag as haatspraak te verklaar.
In sekere gevalle is ou simbole soos die standbeeld van Cecil John Rhodes of straatname van die argitek van apartheid, Hendrik Verwoerd, verwyder, maar in die meeste gevalle het Suid-Afrikaners geleer om saam met en om ou monumente te leef. So is Vryheidspark naby die Voortrekkermonument gebou en almal is gelukkig.
Maar party gesprekke is ’n bietjie moeiliker, soos die sogenaamde Swart Maandag-proteste in Oktober 2017 toe die ou vlag sy verskyning gemaak het as deel van ’n protes teen misdaad wat as die teiken van wit boere gesien word. Die stigting het in Januarie die Gelykheidshof genader en AfriForum as die respondent in die saak benoem.
>> LEES MEER
Politieke hanteerders met Trump-bande bied hulle dienste aan Afrika-politici
Riva Levinson, wat onder die mentorskap van Paul Manafort haar beeldpoets- en politieke konsultasievaardighede geleer het, is een van die vele konsultante met Trump-bande wat ’n gereelde gesig geword het by Afrika- politieke veldtogte.
Paul Manafort, wat Trump se presidensiële veldtog bestuur het, is in Maart vanjaar tot sewe jaar tronkstraf gevonnis vir die indien van ’n vals belastingopgawe, geldwassery en die versuim om ’n buitelandse bankrekening te verklaar.
Namate Afrika-verkiesings meer algemeen en meer mededingend raak, huur die kandidate al hoe meer Westerse firmas om kiesers te swaai en die media se dekking van hulle kandidaatskap te beïnvloed.
Levinson het in die onlangse Nigeriese verkiesing die opposisiekandidaat Atiku Abubakar gehelp, en hoewel hy verloor het, het Levinson en ’n span ander Amerikaanse konsultante gehelp om vir hom vergaderings te reël met belangrike wetgewers en beïnvloeders in Washington.
Dit was nogal indrukwekkend dat iemand wat jare lank weens korrupsie nie ’n visum vir Amerika kon kry nie in Januarie so gulhartig in Amerika verwelkom is. Hy het in die vyfster-Trump Hotel naby die Withuis tuisgegaan.
Abubakar se party het ook die dienste van Brian Ballard (teen $90 000 per maand) gebruik. Ballard was een van die top-fondsinsamelaars in die Trump-veldtog.
Van die Westerse firmas probeer om Trump se kommer – dat China besig is om Amerika verby te steek wat invloed in Afrika betref – uit te buit, en hulle bemark hulle Afrika-kliënte as ’n oplossing vir die probleem. Ballard sê sy firma is besig om nog konsultante met bande in Afrika aan te stel, want hy glo hulle sal meer kliënte wen soos die Trump-administrasie probeer om China – wat miljarde dollar in infrastruktuurgeskenke en lenings aan Afrika-regerings aanbied – te stuit.
>> LEES MEER
Tot môre!
Anneliese Burgess en die res van die VWB-span

Registreer gratis om hierdie artikel te lees.

Die meeste van ons artikels is slegs vir ons intekenaars, maar hierdie een is gratis solank jy registreer.

Reeds geregistreer? Kliek “Meld aan” om voort te gaan

Vrae of probleme?
E-pos hulp@vryeweekblad.com of skakel 0860 52 52 00.

X