Ons wag op die kaptein ...

BULLETIN

Ons wag op die kaptein ...

Nuusbulletin: 27 MEI 2019


Dagsê
Wanneer laas het ons so met ingehoue asem op 'n aankondiging van ons president gewag? Ons het Cyril Ramaphosa baie mooi en positiewe goed hoor sê, en ons hoor ook daagliks hoe Ace Magashule en ander hom probeer saboteer. Ons gaan uiteindelik teen Woensdag of Donderdag wéét of ons die volgende vyf jaar 'n waagmoedige, sterk staatshoof gaan hê en of hy meer geneig tot kompromis en vrede maak gaan wees.
Ons moet ons darem nie morsdood skrik as daar een of twee twyfelagtige figure in die kabinet opgeneem word nie, solank dit net nie in sleutelportefeuljes is nie.
Ramaphosa moet dapper en sterk wees, maar as hy 'n middelvinger vir sy teenstanders gaan wys, gaan hy soveel teenstand van sy uitvoerende komitee en Luthuli-huis kry dat hy in elk geval nie sy mandaat sal kan uitlewe nie.
Daar is die laaste paar jaar baie oor die rol van vroue in ons politiek gepraat, en die ANC en partye soos die EFF het groot beloftes gemaak. Tot dusver lyk die oes maar skraal.
Maar hoe lekker is dit nie om te weet dat twee van die sterkste ysters in ons openbare lewe, mense wat dalk ons geskiedenis gaan herskryf, vroue is nie: Shamila Batohi en Hermione Cronjé van die nasionale vervolgingsgesag.
Daar is min twyfel dat hulle meer soos ons gewese openbare beskermer, Thuli Madonsela, gaan optree as soos Madonsela se opvolger, Busisiwe Mkhwebane. As jy my vra, het Mkhwebane haar hand met die oorhaastige bevindings oor Pravin Gordhan oorspeel en gaan sy nie die einde van die jaar sien nie.
Ek weet vir 'n feit dat Ramaphosa vasbeslote was dat Gordhan in die nuwe kabinet sy belangrike werk met die skoonmaak en transformering van staatsinstellings moes voortsit. Ná Mkhwebane se bevinding, wat sonder twyfel deur die howe uitgegooi gaan word, sit hy met die tameletjie dat hy nie gesien kan word dat hy iemand aanstel oor wie se kop daar 'n wolk is nie. Gaan hy dalk die pos oophou tot ná Gordan se hofaansoek dat die verslag hersien moet word?
Intussen het 'n ander ystervrou, Helen Zille, duidelik aangedui dat sy nie van die politieke toneel gaan verdwyn nie. Sy het begin met 'n reeks artikels oor haar loopbaan as leier van die DA en daarna, en die “foute” wat sy begaan het.
Ek het op Twitter vir haar laat weet dat sy die indruk skep dat sy soos Simson van ouds die pilare van haar party om haar wil laat intuimel, maar sy het vinnig gereageer dat haar bedoeling die teenoorgestelde is. Ons sal sien.
Vrydag se uitgawe van Vrye Weekblad is die laaste gratis een. Van volgende week af sal lesers moet betaal. Ons sal betyds alle besonderhede met julle deel. Ek hoop ons eerste sewe uitgawes het julle oortuig om R25 per uitgawe (R20 vir pensioenarisse) te betaal – dis die prys van 'n dubbele espresso.
Tot Vrydag!
Max du Preez

Registreer gratis om hierdie artikel te lees.

Die meeste van ons artikels is slegs vir ons intekenaars, maar hierdie een is gratis solank jy registreer.

Reeds geregistreer? Kliek “Meld aan” om voort te gaan

Vrae of probleme?
E-pos hulp@vryeweekblad.com of skakel 0860 52 52 00.

X