Die meriete van sportprestasies

!Gaitses julle

Self het ek nou nie ver gekom as ’n sportman nie, maar ek sou darem seker op skool sertifikate kry vir deelname – al was ek ’n reserwe in die atletiekspan! – en as ’n jong speler vir Caledon se plaaslike rugbyklub is my naam ook een jaar by die bekeruitdeling uitgeroep.

My oorle’ ma, wat my na die geleentheid vergesel het, was daardie aand in trane. Die oomblik was groot. Maar die toekenning was min of meer die laaste een wat oorgebly het voordat hulle seker die beste toeskouer van die jaar beloon het; dit was nadat die Sportman van die Jaar en al die voor- en agterspelers van die jaar, asook die mees toegewyde speler aangewys is...