Ek sal vir jou skree teen 200km/h, Ungo-Potsy QuaMall O’Teen-He!

Dagsê!

Ek moet bieg ek het eers die afgelope seisoen agtergekom Formule 1 is weer kykbaar. Trouens, dis dramaties, mededingend, glamorous soos kan kom, opwindend, onvoorspelbaar, en gevaarlik, soos dit hoort. Lewis Hamilton en Max Verstappen het presies dieselfde getal punte voor Sondag se beslissende Grand Prix in Abu Dhabi, en daar is 'n menigte maniere hoe die twee mekaar kan probeer bedonner om 2021 se wêreldkampioen te word.

My nuutgevonde fassinasie met Formule 1 het baie te doen met die plofbare stryd tussen Hamilton en Verstappen, hoewel ek nie veel erg het aan enige van die twee nie; Lewis is 'n ou goody-two-shoes en Max gaan tekere soos 'n gemoedsbewolkte tiener wie se onbetwisbare talent nie altyd opmaak vir sy swak oordeel in die hitte van die oomblik nie...