Groetnis en genade (gesteel by Antjie Krog)

Goeiemôre, liewe vriende

Ahooi uit Paternoster. Hierdie lieflike, sagte dorpie met sy vele skurwe kante van armoede en swaarkry. Ek het gistermiddag gaan swem in die ysige see hier op Bekbaai waar ek bly (watter lieflike naam is dit nie?). Ek het my baaibroek by die huis vergeet, so dit was ’n situasie van swem in volle kleed. Maar whatever, ek is ’n tannie, so wie gee nou actually om? Beslis nie ek nie. 

My padreis deur die Weskus gaan gepaard met ’n boekskrywery – vir ’n groot vriendin van Vrye Weekblad, die onafhanklike uitgewer Annake Müller (https://www.instagram.com/annakemullerpublishing/?hl=en). Ek voel-voel my pad deur die teks. Ek twyfel oor my aanslag. Ek voel gedurig selfbewus oor my woorde. Wonder of dit te sentimenteel is, te soetsappig, te self-indulgent. Te, te, te?..