Wanneer dit voel of die wêreld op sy kop staan

Goeiemôre

Dié week gaan ek vir ’n paar dae na Antwerpen. Op die spoor van Art Nouveau – die argitektuur-en-ontwerpbeweging wat in die 1890’s in België ontstaan het voordat dit na die res van Europa versprei het. Gewoonlik maak ek net ’n vinnige heen-en-weertjie na die stad vir werk en die enigste argitektuur wat ek sien, is Antwerpen se sentrale spoorwegstasie – wél een van die mooistes ter wêreld wat nie verniet spog met die bynaam “spoorwegkatedraal”nie.

’n Kort wegbreek dus. Nie soseer om vakansiejolyt te hou nie, maar eerder nuwe inspirasie te vind en weg te kom van die beklemmende gevoel wat die nuus my deesdae gee...