OP Vrydagoggend 30 Oktober is Vanessa Jooste soos altyd vroeg op en te voet onderweg van Grassy Park na Ottery. Hier bestuur sy ’n organisasie wat kinders in een van die Kaap se bendegeteisterde gebiede ondersteun. Sy voel op dié oggend snaaks, onthou sy later, maar sy hou aan stap – af in Klipweg en dan aan met die ou Strandfonteinpad tot waar sy regs draai in Otteryweg.

Oorkant die Pick n Pay Hipermark gee haar voete pad wanneer sy by die sypaadjie afstap en sy val. Vanessa kom weer orent en stap aan tot by die Kingdom Kidz Educare-sentrum waar sy vir haar ontbyt maak. ’n Vriendin bel en Vanessa het lus vir gesels, maar sy kan nie haar woorde uitkry nie.

Op Sondagmiddag 1 Desember 2013 ontvang Jan van der Merwe, ’n bemarkingsbestuurder by Boehringer Ingelheim in Johannesburg, ’n oproep van sy skoonpa in Witrivier. Sy vrou, Sonette, se ma het eienaardige simptome getoon en daarna flou geval. In sy skok kan skoonpa nie die noodnommer onthou nie...