’n Reёnboognasie op ’n ashoop

“MEISIEKIND, het jy al ooit armoede gesien?"

Ek aarsel. “Um, ek dink so. Wel, armoede is nie noodwendig die teenoorgestelde van rykdom nie. Dis om van onafhanklikheid ontneem te word. 'n Ryk omvang van 'n swak opvoeding wat jou onbeholpe die wêreld instuur, huishoudelike geweld, werkloosheid, 'n paaiement wat jou 'n slapelose nag of twee gee, tot 'n oorsese vakansie wat jy eers moet uitstel. Om nie te weet waar jy vandaan kom, of wat jou toekoms inhou nie. Ek het gelees van 'n pa wat sy kinders paai deur herhaaldelik te sê dat die pap amper-amper gaar is, totdat hulle van die honger flou val en deurslaap. Dit hang seker af wie jy vra."

“Het jy al 'n woonbuurt gesien waar die mense so arm is dat daar nie 'n enkele plastieksak rondlê nie?"..