Gemuilband deur Die Boord-bubble-juffrou

MY skoonma het 42 jaar gelede gedink ek is ’n opstoker. Miskien was sy reg.

Vandag weet ek hoe dit voel om op jou plek gesit te word. Ek’s sommer net so onseremonieel uitgeskop en gemuilband.

Dis so maklik soos dit. Iemand stel haarself aan as admin en stig Die Boord Telegram Sosiale Groep met baie goeie bedoelings. Dan gebruik sy die delete-knoppie nes sy wil. Maar sy maak eers seker almal weet hoeveel mag sy het en swaai die septer links en regs, dreig en vermaan, want sy is aan niemand verantwoordbaar nie. Sy stel self die reëls op en pas dit selektief toe soos dit vir jou gemaklik of ongemaklik voel. Hierdie sogenaamde reëls is ontwerp om te sorg dat niemand “stir” nie. Ook dat mense niks sinvols kan bespreek nie. Nee, sosialemediaplatforms soos buurtgroepe moet net lekker wees. Hier is nie plek vir demokrasie nie. Niemand kan jou kritiseer nie. Niemand kan voorstelle maak hoe om die groep meer sinvol te maak nie. Maar almal, veral knorpotte, is welkom om te kla oor hondebolle op die gras, katjies wat weggeloop het, mense wat stopstrate ignoreer en “ongewensde elemente” in “ons area”. Maar, o wee, moet net nie waag om ongemaklike vrae te vra nie...

Deel