Miss Lelie se legendariese afval

PENS EN POOTJIES

Miss Lelie se legendariese afval

Afval sonder kop is die helfte lekkerte missing, skryf Isabella Niehaus in haar boek, Duinhuis, waarin hierdie resep verskyn.


Karen Moyle, alias liewe Miss Lelie, het die grootste hart en ongelooflikste siel wat ek nog teëgekom het. Ek leer haar ken as boervrou. Ek kry my kat Picasso by haar. Die eerste dag wat ek haar ontmoet, ry ek op die grondpad hek toe en daar is ’n pasgebore kalfie. Maar pas, pas gebore. Ek draai net daar om, jaag plaashuis toe en gil op Lelie dat hulle die koei moet gaan help. Sy het pas gekraam! Die kalfie is toe ook summier Bella gedoop … net om later uit te vind Bella is eintlik ’n bulkalfie!
Karen maak mooi waar sy ook al gaan. Sy kan met net ’n paar takkies uit ’n tuin, ’n stuk lap en tou die mooiste tafel dek … en, al eet ek nie afval nie, haar resep is legendaries!
1 hele stuk afval: kop, pens en pootjies, skoongeskrop750 ml witwyn 2 uie, geskil en in ringe gesny 4 lourierblare Lekker baie knoffel6 aartappels, geskil en in kwarte gesnyKerrie, borrie en blatjang, na smaak
Afval sonder kop is die halwe lekkerte missing.
Was die afval weer af, en sit in ’n oondskottel. Maak al jou halwe bottels witwyn bymekaar, gooi oor die afval tot bedek. As jy nie ’n ‘wyn-laat-oorstaner’ is nie, gooi ten minste 1 hele bottel (750 ml) witwyn oor, maar bedek die hele afval.
Voeg die uie, lourierblare en knoffel by. Sit die deksel op. Laat teen stadige hitte, so 170 °C, oornag in die oond gaar word. Skoon afval en baie, baie wyn laat nie jou huis na afval ruik nie, so proceed to perfection.Nou is dit oggend en met groot opwinding en afwagting haal jy die skottel uit die oond en maak oop ... Al die vleis behoort nou van die bene af te wees. Haal die meeste van die bene uit en ook die odd tanne wat aan die kakebeen vir jou loer ... Gooi die meeste van die vloeistof af en sit eenkant.Gooi die aartappels in die skottel en kook tot sag in die vloeistof wat nog in die bak is. As nog vloeistof benodig word, gebruik van dié wat eenkant gesit is.Sodra die aartappels sag is, voeg die kerrie, borrie en blatjang by.Laat kook deur en bedien dan met lus.Dis nou lipleklekker, taailiplekker!Geniet met Posmeester van Hermanuspietersfontein.

Registreer gratis om hierdie artikel te lees.

Die meeste van ons artikels is slegs vir ons intekenaars, maar hierdie een is gratis solank jy registreer.

Reeds geregistreer? Kliek “Meld aan” om voort te gaan

Vrae of probleme?
E-pos [email protected] of skakel 0860 52 52 00.

X