BOEKBEDONNERD | Die jaar se 17 beste boeke oor politiek, mense en die lewe

1. ’n Politikus saam met wie ek oorlog toe sal gaan

NÁ vier dekades van politieke verslaggewing het ek 'n gesonde sinisme oor politici. Hulle is meestal van 'n soortgelyke egoïstiese persoonlikheidstipe met brandende ambisie en 'n hunkering na mag en roem. Party is uiteraard beter en minder skelm as ander, maar bitter min van hulle word werklik aangevuur deur 'n begeerte om die belange van die burgers te dien.

Maar as daar één politikus is met wie ek oorlog toe sal gaan, soos die uitdrukking lui, is dit Pravin Jamnadas Gordhan. Hy breek die stereotipe aan stukke. Op 72 is hy steeds in sy hart 'n aktivis. Hierdie boek gee 'n uitsonderlike insig in die lewe van Gordhan, 'n rara avis in die Suid-Afrikaanse politiek...