Bedrogwetenskap: hoe korrupte SA akademici navorsingsmiljoene opraap

WANNEER Suid-Afrikaners oor korrupsie praat, verwys ons na ’n spoedvraat wat ’n verkeersbeampte omkoop, ’n munisipale bestuurder wat die tenderregulasies oortree of ’n politikus wat ’n familielid in ’n departement onder sy toesig aanstel.

Niemand praat oor akademici wat drie basiese take moet verrig nie: om te onderrig, navorsing te doen en gemeenskapsdiens te lewer. Vandag wil ek een van die skandaligste vorms van bedrog in hoër onderrig aan die lig bring – iets wat akademiese korrupsie genoem word.

Geen direkte geld word aan dosente vir onderrig of gemeenskapsdiens gegee nie, maar biljoene word aan navorsing bestee, en dis waar die akademiese aasvoëls rondhang om belastingsbetalersgeld op te raap. Trouens, vir navorsingspublikasies van 2018 sal die regering se departement van hoër onderwys en opleiding sowat R2,3 biljoen aan universiteite uitbetaal...