POLITIEKE NOTABOEK | Die ge-Zoom van die bye en die lekker turksvye

LY Jacob Zuma aan patologiese vervolgingswaansin, of speel hy net so lank al slagoffer om met spreekwoordelike moord weg te kan kom dat hy dit nou self begin glo?

Hy onderteken sy jongste klaaglied vir die eerste keer, sover ek kon vasstel, nie net met die naam wat sy pa hom gegee het nie, Gedleyihlekisa (“hy wat glimlag as hy jou seermaak”), maar ook met die naam wat sy ma hom gegee het, Mhlanganyelwa. Hy het jare gelede oor dié naam gesê: “It perhaps all makes sense now, for the literal meaning of the name is when people conspire or gang up against you!"

In die transkripsie van sy voorlegging aan die ANC se topses via Zoom twee weke gelede sê hy herhaaldelik dat daar al verskeie aanslae op sy lewe was. (Net een van dié “pogings tot sluipmoord” het die wetstoepassers se aandag getrek: toe een van sy vroue hom kwansuis vergiftig het. Maar die ondersoek het bevind dat daar geen getuienis bestaan dat dit wel gebeur het nie.)..