Die transformasie-reis: Kom ons vat hande

IN 1988 bring my neef, Obe Phillips, later predikant van die Verenigende Gereformeerde Kerk in Suider-Afrika en deesdae woonagtig in Nederland, die destydse Vrye Weekblad onder my aandag. Dit was liefde met die eerste oogopslag. Ek geniet toe dadelik die puik joernalistiek; die joernalistiek wat nie neutraal was nie, maar in die hoogty van apartheid ’n partydigheid uitgespreek het vir menswaardigheid, heling van wonde, geregtigheid, vryheid en gelykheid.

Groot was my teleurstelling toe Vrye Weekblad nie kon voortbestaan nie. Maar nog groter was my dankbaarheid toe Vrye Weekblad herrys in die derde dekade van ons demokrasie. Met sy bydrae tot openbare meningsvorming het Vrye Weekblad apartheid help afbreek. In sy nuwe gedaante help Vrye Weekblad ons op die voortgaande transformasiereis van ’n apartheidsamelewing na ’n samelewing waarin die demokratiese visie van menswaardigheid, heling, geregtigheid, vryheid en gelykheid vir almal werklikheid word.

Teen hierdie agtergrond is dit vir my ’n vreugde om my eerste bydrae vir Vrye Weekblad te skryf. Hierdie bydrae fokus op transformasie...