Drome word nat en brommers vier fees waar ANC se rioolpyp na benede stort

DALK is Cyril Ramaphosa nie so gevestig as wat ek al vir maande beweer nie.

Oor net meer as ’n jaar is dit weer leierskapsverkiesing in die ANC. Dit is nou duidelik dat die ineenstorting van die sekretaris-generaal (SG) se kantoor die ANC in die aanloop na die verkiesing ongelooflik verdeeld en broos laat. Ramaphosa kry duidelik nie beheer oor tak- en streekpolitiek nie. Die president van die ANC is baie bewus van die vernedering wat hom te beurt kan val in Desember 2022 indien hy nie sy invloed na die provinsies uitbrei nie.

Kom ons neem bestek van die breë politieke landskap voordat ons terugkeer na die president se struikelblokke op pad na ’n tweede termyn. Dit is sekerlik maklik om die ANC te haat vir wat dié party aan ons ideale vir ’n demokratiese Suid-Afrika gedoen het, maar om net die regerende party vir die benarde situasie te blameer is ’n veralgemening wat min nuwe insig sal bring...