Oor Spanner Maartens en waarom 81 die getal van die week is

ONS vra om verskoning. Die sportredaksie moes ons dekking van die Mamparalimpiese Spele kortknip toe Suid-Afrika se groot hoop vir goud in die draadsitnommer aan die verkeerde kant afdonner.

Almal weet hoe gevaarlik dit is om te bestuur terwyl mens op die foon praat, en ons man Cyril was op die lyn Moskou toe, pleks daarvan om te fokus op die groot planne wat hy nie gaan uitvoer nie.

Dit was glo ’n goeie gesprek. Cyril het vir daai Poe-Poe-Putin van raad gedien oor hoe mens maak as jy ’n bom lángs eerder as óp ’n kinderhospitaal wil laat ontplof, tydens ’n oorlog wat nie ’n oorlog is nie...