Geagte mnr. Du Preez

Ek is seker een van die “ooms” – u is slegs anderhalf jaar jonger as ek, wat u gewis ook een van die “ooms” maak! – wat Afrikaans skryf wat na u mening rektaal met ’n stok gepenetreer is. Desondanks, en wel wetende dat u u nie hieraan gaan steur nie, sê ek vir u dat ek lanklaas so ’n klomp snert gelees het as u stukkie onder die opskrif “Die demokratisering [nogal!] van Afrikaans”.

U het in die verlede al dikwels geskryf oor u Hugenote-, Voortrekker- en Vrystaatse herkoms, en hierdie geskriffie van u getuig daarvan: dwarstrekkerig en eiesinnig. En dis kwalik werklik demokraties. U maak eiehandig die ou grappie waar dat waar twee of drie Afrikaners byeen is, hulle vier kerke en vyf politieke partye stig. Terselfdertyd gee party van u uitsprake te kenne dat u in die kamp van die “Wênderbaails” en die “Kloeties” is wat dink solank iets net Engels is of net van Engels af kom, dit universeel, wonderlik, aanneemlik en “demokraties” is...

DEEL