Wyngaard het in AfriForum se lokval getrap

ONDER die beste omstandighede verteenwoordig Heindrich Wyngaard en sy Kaapse Forum (vir my) die gesimuleerde orgasme van die impotente. In ’n sekere sin verskil hy glad nie van Julius Malema nie; albei manipuleer die emosies van mense wat glo hulle het ’n goor deel van die vredesdividend gekry – mense wat uiteindelik moes terugtrek na die veiligheid van denkbeeldige nasionale of etniese identiteite om vir “hulle mense” te praat of hulle te verteenwoordig. Wyngaard sou vir “bruin mense” en Malema vir “die Afrika-kind” praat.

Op ’n ander manier het Wyngaard homself geassosieer met een van Suid-Afrika se weergawes van die uitdruklik regsgesinde etnonasionalisme wat nou oor die wêreld waai (en waarmee Malema se EFF terloops dalk geassosieer kan word). Dit is geen verrassing nie dat Wyngaard as’t ware deur AfriForum onderskryf word. Ek vermoed hy gaan kort voor lank ondersteuning kry van die mense wat graag wil hê “die Kaap” moet afstig. Hierdie is dan my beleefde manier om te sê Wyngaard speel met vuur. Sy Kaapse Forum vergiftig nou verder die waters van Suid-Afrikaanse politiek, wat ’n reeds verdeelde samelewing nader aan ’n afgrond sleep. Die vryheidsbeweging wat ons regeer, het reeds die monsters geword wat hulle beveg, en die Nietzscheaanse afgrond is besig om te verrys uit die newels van opstande, plundering, dodelike xenofobie, die ineenstorting en mislukking van gesondheidsorggeriewe, en vervoer- en dienstenetwerke landwyd.

‘Coloured politics and the Politics of Coloureds’..