Mislukkende staat? Of net struikelend?

DIE term “struikelende staat" het onlangs hier in Vrye Weekblad sy verskyning gemaak as ’n beskrywing van die Suid-Afrikaanse situasie. Dit spreek meer tot my as “mislukkende staat" – al sien ek groot rooi vlae wapper.

’n Atleet kan ’n hele ent struikelend voortsukkel en nog steeds die wedloop suksesvol voltooi. My Land Rover het dit al by geleentheid hikkend en stotterend tot by die werktuigkundige gemaak en is herstel.

“Struikelend” spel onstabiliteit, gebreke, agteruitgang en groot risiko’s, maar darem nog nie mislukking nie. “Mislukkend”, daarenteen, verwoord ’n soort tonnelvisie. Dit is net ’n kwessie van tyd voor die einde aanbreek...