Sonder ’n beter NUK kan daar ook nie ’n beter ANC wees nie

WAT sou die punt van ’n ANC-topses met integriteit wees (wat al klaar onwaarskynlik is) as hulle omring word deur ’n klomp wolwe in die nasionale uitvoerende komitee (NUK)?

Dit was die NUK wat die destydse pres. Jacob Zuma tydens die Nkandla-skandaal beskerm het, bewerings van staatskaping afgemaak het en aan LP’s voorgeskryf het hoe om die twee parlementêre mosies van wantroue teen die misdadige president te hanteer op die hoogtepunt van onthullings oor die ware omvang van die Guptas se houvas op hom. (Toegegee, dit was ook die NUK wat die onaantasbare Zuma uiteindelik herroep het.)

’n Posisie in die NUK is baie gesog en maak die deur oop vir ministeriële en regeringsposte sowel as invloed in die sakegemeenskap en elders in die privaat sektor...