Fluit, fluit, is die storie uit?

EINDE VAN ´N HOOFSTUK

Fluit, fluit, is die storie uit?

LINZA DE JAGER het op haar dag in Hermanus se beroemde boekwinkel gewerk. Sy skryf oor nostalgie en leesliefde en weet nie of dié storie ’n gelukkige einde gaan hê nie.



TOERBUSSE hou hier stil. Dit verskyn in Rudie van Rensburg se roman Judaskus. Die Skotse misdaadskrywer Ian Rankin het al hier gekuier. So ook die akteur Rowan Atkinson, oftewel Mr Bean, die kinderboekskrywer en illustreerder Niki Daly, premier Helen Zille, die fotograaf Lien Botha, en skrywers soos Tinus Horn en André P Brink. Nataniël het met sy besoek aan Hemingway’s-boekwinkel in Hermanus aangekondig: “Hier kan ek bly!”
Die Lonely Planet Guide noem die winkel, die Louis Vuitton City Guide – Cape Town verwys daarna as ’n “must-see” en selfs die New York Times het al hiervan melding gemaak.
Ek het in ’n stadium in hierdie beroemde winkel gewerk. Ek moes die Facebook-blad behartig en het diep in my hart geweet hulle het my nie nodig nie. Maar ek het die geld nodig gehad en ek dink die eienaars het dit uit die goedheid van hul hart gedoen.
Die goedhartiges is die skrywer Beth Hunt en haar kunstenaarman Noel, sy 'n rooikop wat borrel soos 'n bottel Fanta wat pas oopgemaak is, en hy ’n stil witkop man.
Stap jy hul 24-jarige winkel binne is dit asof die horlosie gaan stilstaan het in die tyd toe Charles Dickens se The Pickwick Papers nog as ’n vervolgverhaal stuk-stuk gepubliseer is. Dis helder oordag, maar hierbinne brand lamplig. Klassieke musiek streel die ore en wierook die neuse.
Speel met nostalgie, is hulle jare gelede aangeraai en dit doen Beth en Noel met oorgawe, want albei is vintage-liefhebbers. Die resultaat is 'n winkel wat 'n kruis is tussen 'n herehuis se biblioteek en jou sitkamer.
Mense vergelyk dit gereeld met Parys se beroemde Shakespeare & Company, maar as daar ooreenkomste is, is dit bloot toevallig, want geeneen van hulle twee het al ooit ’n voet gesit in Rue de la Bûcherie nie. Die winkel fokus hoofsaaklik op boeke wat as versamelbaar beskryf kan word, en sluit dus heelwat Africana in. Met die laaste telling was hier meer as 30 000 boeke, maar intussen het daar al weer baie ingekom. Hulle gaan tuis tussen talle ornamente, soos 'n groot glasvesel-Betty Boop, die beroemde strokiesprent-karakter uit die 1930’s. Daar is ook 'n geselshoekie met antieke meubels, waaronder 'n mooi “carver-” stoel. Die hoek waarin dié stoel staan, was met die opening van Hemingway’s in 1995 al waaruit die winkel bestaan het.
KLOKSLAG om halftien elke oggend wanneer die Hunts oopsluit, stoot Noel 'n fiets op die sypaadjie uit en parkeer dit voor die winkel. Dis deel van atmosfeer skep, want daar word nooit met die fiets gery nie.
Hy voer die taak rustig uit, want hy't 'n kleintjie dood aan 'n sinnelose gejaag en die gekliek van die internet. Beth skakel die ketel aan. Die eerste groot ritueel van die dag breek aan: Dis tyd vir koffie en hawermoutkoekies. Dié is kort tevore in die Hunts se kombuis in Botrivier gemaak. Hulle word stadig geëet en krities beoordeel.
Beth buk af om die katte, Beanie en Pippa, se mae te krap. Die eerste een is sowat ses maande gelede hier “geplant” – of weggegooi, afhangende van hoe jy daarna kyk. Dis 'n blessing, sê Beth. "Beanie leer my van die lewe." Só 'n uitspraak kan net kom van iemand wat die wêreld met ’n skrywersoog bekyk. Beth is die skrywer van Hermanus – Whales, Wine, Fynbos, Art asook verskeie stories wat in bundels opgeneem is en ’n horde tydskrifartikels. Een van haar stories het verskyn in ’n bundel misdaadverhale, Bloody Satisfied – juis een van die boeke wat Rankin destyds gekoop het.
Sy staan op, trek haar oranje streepvoorskoot aan en vat die verestoffer. Dis tyd om boeke af te stof, kondig sy aan.
Maar al hierdie rituele kom binnekort tot ’n einde.
Al is Beth en Noel so nou verweef met die winkel soos die drade van 'n tapisserie, gaan albei binnekort ‘n nuwe hoofstuk begin: Beth jeuk om voltyds te skryf en Noel wil weer sy kunsloopbaan voortsit.
Daar is belangstelling om die winkel oor te neem, maar die toekoms is nog onseker.
En die katte? Wat gaan van hulle word?
Beth troos: "Dis net ’n ‘n kosskool dié, het ek hulle vanoggend gesê. ‘Wanneer mammie en pappie die winkel verkoop, kom julle saam met ons huis toe.’"
Het jy geweet?
• Hemingway’s is geleë in 'n storieryke deel van Hermanus se Ou Dorp. Dis 'n katsnorbaard van verskeie kunsgalerye en Harbour House Hotel, wat uitkyk oor Walker Bay met sy walvisse, is 'n paar treë van die winkel. Die hotel was eens op 'n tyd die huis van 'n ryk ou dame wat stoksielalleen daar gewoon het. Die storie lui dat 'n chauffeur haar in haar Rolls Royce rondgeneem het, en dat 'n Rembrandt-skildery na haar dood tussen haar besittings gevind is.
• Die oudste gebou in Hermanus is skuins oorkant die boekwinkel. Dié rietdakgebou, wat in 1875 gebou is, is tans die tuiste van die Burgundy Restaurant. Maar die kos het later gekom. Liefde was eerste. Die Sweed John Louis, wat hier naby in die Ou Hawe vissersbote gebou het, het hier gewoon. Hy was verlief op ene Martha Wessels, maar hul liefde was problematies aangesien Martha se man verdwyn het. Sy kon nie weer trou nie aangesien sy dood nie amptelik bevestig kon word nie. Die bootbouer het uit respek vir die situasie homself Swede Wessels genoem. Hy het vir Martha 'n huis agter syne gebou, en haar kinders en kleinkinders het hom pa en oupa genoem.
• Die winkel het 'n tenger skakel met die Sestiger-beweging. Een van die vorige winkelassistente, Veronica Engelbrecht, het in 'n huisie in die agterplaas van die skilder Marjorie Wallace gewoon. Dié bekende skilder was toe reeds bejaard. Saans het hulle 'n wyntjie geniet. Sestigers soos Ingrid Jonker, Uys Krige en André P. Brink het hier in Vermont vir Marjorie en haar man, die skrywer Jan Rabie, kom kuier.
• Shakespeare & Company in Parys het ook 'n inwonende kat. Iemand wat al daar was, het vir Beth vertel van Agatha. Sy is so gedoop omdat sy onder die boekrak gevind is waarin Agatha Christie se boeke was.
Besoek Hemingway’s by Warrington Place 4. Die telefoonnommer is 028 312 2739.
NUUT: Jy kan nou kommentaar lewer op hierdie storie. Gaan na heel onder op hierdie bladsy om jou sê te sê. Ons hoor graag van jou!

Registreer gratis om hierdie artikel te lees.

Die meeste van ons artikels is slegs vir ons intekenaars, maar hierdie een is gratis solank jy registreer.

Reeds geregistreer? Kliek “Meld aan” om voort te gaan

Vrae of probleme?
E-pos hulp@vryeweekblad.com of skakel 0860 52 52 00.

X