Flamingo bied hoop wanneer borskanker dreig om dit weg te vat

DIT is kliniekdag by Groote Schuur-hospitaal se buitepasiënte-afdeling en 130 mense sit en wag. Onder hulle is bloedjong, middeljarige en bejaarde vroue wat wag op ’n afspraak om hul borste te laat ondersoek. Sommige se man of vriende het saamgekom. Dogters hou hul bejaarde ma’s se hand vas om hulle te help hoop. Vrees is die grootste gemene deler.

Liana Roodt, Francois Malherbe en nog vyf dokters is aan diens en sal sorg dat elk van hierdie bekommerde pasiënte ondersoek word. Mediese studente staan by om te leer.

“Dit voel vir my of my liggaam besig is om my bors te verwerp,” sê ’n vrou vir Roodt. Sy ervaar ongemak en stres. Roodt stry nie met haar nie – sy verstaan haar angs en stel haar gerus.  Dié pasiënt het nie kanker nie, wel ’n niekwaadaardige groeisel, ’n fibro-adenoom, wat heel algemeen voorkom. Roodt reël dadelik ’n datum waarop dit verwyder kan word...