’n Boeiende mark vir wraak, woede, waagmoed, politiek en patos

EK leen graag hierdie aanhaling by die skrywer Shannon L. Alder wat sê: “Every writer dreams about the day they can step into their fiction and wander its hallways.” Dis presies wat Teksmark bied – ’n geleentheid aan skrywers om hul fiksie te betree en gehore op reis te neem deur die gange van hul stories.

In 2019 is Teksmark in sy vierde bestaansjaar. Die doel is om nuwe Suid-Afrikaanse tekste vir die verhoog te ontwikkel, en alle tale en stories is welkom. Tydens hierdie geleentheid word uittreksels van 10 minute elk opgevoer, en voorgelê aan borge of kunstefeeste met die oog op verdere ontwikkeling. Hoewel dit laat in die jaar plaasvind, voel dit asof teaterliefhebbers ’n vars inspuiting kry van dit wat in die volgende jaar in teaters beleef kan word.

Van die toneelstukke wat al uit hierdie projek ontstaan het, is Amee Lekas se Dans van die watermeid, Wessel Pretorius se Wilde-als, Bauke Snyman se Swerfgoed, en Marina Albertyn se Melk en vleis. Die Fleur du Cap-teaterpryse het in 2018 die Teksmark vereer met ’n spesiale prys vir vernuwing...