Misverstand in die diamantfabriek

DIS asof Dag 1 ’n ewigheid duur. Die rooftog moet nog verfilm word. Daar is drie tonele waaruit die rooftog bestaan. Dit begin by die wegkomkar oorkant die straat, dan beweeg dit die gebou binne. Daar is ’n veiligheidswag wat ook ’n medepligtige is. Dit vereis ’n hele paar opstellings.

Laastens kom ons by die werkwinkel. Hier stel ons weer tonele op waar die eintlike rooftog plaasvind, en moet dan terug straat toe vir die wegkomkans. Die baas van die bende, wat ek Getaway Gus gedoop het, wag om in my Datsun weg te jaag. Ons plan is om Gus agter die stuurwiel heel laaste te skiet.

Dis die vuurwapens wat almal senuweeagtig maak. Dis net kastig, maar die roofopset by die diamantfabriek is wel effens spannend. Daar is ’n gevoel van werklikheid aan alles. Niemand is op hul gemak nie, al is twee van die wapens namaaksels...