Boekbedonnerd nr. 31 | Millenniër-angs, white trash, swart woede, geestesiektes en die glibberigheid van skuld

1. Soveel meer as net ’n romkom

Die teenoorgestelde is net so waar deur Azille Coetzee is 'n roman wat afwyk van die romantiese resep. Waarin die skrywer slaag, is om die kwessies en kopruimte van millenniërs te laat oopvou.

Ek was beïndruk met Coetzee se In my vel, haar memoires oor wit-wees, vrouwees, Afrikanerskap. Ek het gewonder of iemand met ’n doktorsgraad in filosofie ’n leesbare roman kan skryf: Sal dit nie presieus en selfbewus wees, sal haar hand nie te swaar wees, sal sy dit nie te filosofies laai nie, die karakters met te veel ideologiese bagasie opsaal nie? Die antwoord op al hierdie bedenkings is “nee”. Die roman is eindeloos onderhoudend en vlot, die karakters word deel van jou koplandskap. Op ’n sekere (vlak) vlak kan jy dit amper lees as chicklit – Jane Austen vir die 2020’s, Thirtysomething vir hierdie millennium. Ek kan al die romkom op die silwerdoek sien, slick en gesofistikeerd dog toeganklik, soos Four Weddings and a Funeral...