‘Dis op die treine waar ons almal mekaar in die oë kan kyk’

DIE Passasierspooragentskap van Suid-Afrika (Prasa) besef dalk nie hoeveel kaartjieverkope op die Kaapstadse suidelike spoorlyn aan Lorenzo Davids se aktivisme vir openbare vervoer te danke is nie.

Sedert die diens laat verlede jaar herleef het, en met die verslapping van Covid-inperkings, het Davids sy meer as 12,000 Twitter-volgelinge aangemoedig om die trein te gebruik. Soos toe hy die “200%-toename” gevier het toe twee ander passasiers by hom op die Plumstead-stasie aangesluit het vir die oggendpendel na die stad.

Davids het die afgelope drie maande konstant op Twitter gewys op die spooragentskap se pogings om sy diens reg te ruk. Die aantal pendelaars op die suidelike lyn het sedert einde Januarie van enkeles tot in die honderde gespring...