Valerie Desmore: onder die vel van die vraagteken-vrou

SY is die aanwesige afwesige. Aanwesig. Afwesig. Die een wat nie is wat jy dink sy is nie. Sy is kunstenaar, mode-ontwerper, byna twee dekades vir Marks and Spencer.

Oor haar het die wêreldwye web maar min te sê. Gebore in die Kaap in 1925, volgens Google dag en datum onbekend, sterf op 14 Augustus 2008 in Londen. Haar ouers was onderwysers; haar pa Abe J.B. Desmore, voorste intellektueel met ’n meestersgraad in die onderwys van die Columbia-universiteit en lid van die African Political Organisation, later bekend as die African People’s Organisation (APO), wat in 1902 in die Kaap gestig is. Die gesin emigreer in 1946 na Engeland, waar sy kuns aan die Slade School of Fine Art studeer, en daarna in Wene by Oskar Kokoschka, onder meer bekend vir sy invloed op die Weense Ekspressionisme.

Sy is Valerie. Valerie Elizabeth Desmore. Een van die 40 swart vroue wie se kuns tot Januarie volgende jaar in die Norval Foundation se galery in Tokai te sien is in die uitstalling When Rain Clouds Gather: Black South African Women Artists, 1940 – 2000, onder kuratorskap van Portia Malatjie en Nontobeko Ntombela...

DEEL