BOEKBEDONNERD nr. 38 | Chemie, die paradys, sektes, susterskap en die dood

Lessons in Chemistry deur Bonnie Garmus

Ek het eenkeer ’n dokumentêr gesien waarin ’n sushimeester oor sy kuns gesels. Hy het gesê elke happie moet jou ’n “aaaaaa-gevoel” gee, asof jy in ’n warm bad ingly. Sekere boeke is so – helaas nie genoeg nie. Boeke soos Bonnie Garmus se Lessons in Chemistry. Ek kan dit nie hoog genoeg aanbeveel nie. Dis suiwer genot.

Elizabeth Zott is ’n kompromislose vrou. Kompromieë kom nooit eens by haar op nie. Sy is ’n wetenskaplike in die vroeë 1960’s, toe vroue liefs by die huis moes bly en kinders grootmaak in fleurige rokkies soos Stepford Wives. Sy het nie haar D voltooi nie, want haar mentor het haar seksueel geteister, aangeval en toe van die doktorale program afgeskop. Sy is ongelukkig sag op die oog, en in die manswêreld van laboratoriums en bunsenbranders word sy as ’n versiering beskou. Sy werk by die Hastings-navorsingsinstituut, waar ondergemiddelde manlike kollegas haar idees steel en met haar kallers ploeg terwyl hulle aan haar boud vat...

Deel