Marthinus Versfeld: ‘Ons kan nie bekostig om oppervlakkig te wees nie’

MARTHINUS Versfeld was besig om te werk toe ek daar aankom. In sy hand was die bladproewe van sy jongste boek, St Augustine’s Confessions and the City of God. Dis ook waar ons gesprek begin het.

“Jy weet, ek is al vir die laaste 60 jaar byna met Augustinus deurmekaar. Dis ’n konstante liefhebbery. Ek het op hom verlief geraak toe ek nog ’n student was. Dit is nou my finale afhandeling van Augustinus. Dit sal miskien ook die laaste ding wees wat ek skryf. Maar ek is nie ontevrede daarmee nie.

“Ek het baie sonde met die manuskrip gehad. Jy weet, die uitgewers wou wragtie ’n borg hê. Hulle wil niks riskeer nie. Nou God, ek gaan mos nie handeviervoet rondloop om ’n borg te kry nie. Toe het ek maar besluit ek sal dit self doen. Ek het dit aan Unisa gestuur, maar die mense wou dit nie uitgee nie. Dis nie geleerd genoeg vir hulle nie. It’s the gaffe of the century! Ek het dan nie genoeg aantekenings en goed nie. Ek is daardie stadium al baie lank verby...