“Ons is trots op die rol wat ons gespeel het [voor 1994]. Geen voorbehoude nie. Ons het beslis nié gewerk vir wat die laaste dekade of so in die land gebeur het nie: staatskaping, korrupsie, wanadministrasie, magsmisbruik, hebsug, goedkoop populisme, onverdraagsaamheid en raspolitiek,” sê Du Preez.
“Ons missie vandag is fundamenteel dieselfde as in 1988: soek die feite; wys geen genade vir diegene in magsposisies nie; sny deur die mis en rook en geraas en kom by die waarheid uit. Ons taak is om ’n ingeligte openbare mening te help skep en so ons demokrasie te dien.”
Alhoewel Vrye Weekblad in Afrikaans uitgegee sal word, is dit nie net gerig op Afrikaners nie.
Dit is “geensins ’n Afrikaner-publikasie nie”, sê Du Preez. “Dit is ’n Suid-Afrikaanse webkoerant in Afrikaans, vir almal wat Afrikaanssprekend is of Afrikaans verstaan.”
Vrye Weekblad word uitgegee in samewerking met Tiso Blackstar Group, die uitgewer van die Sunday Times, TimesLIVE, Business Day, Sowetan en ander titels.
HOOFFOTO: 123RF/Felix Pergande/Vrye Weekblad