Een klein stappie weg van huisarres

DIT lyk op papier na 'n gebalanseerde, intelligente program om die staat van inperking geleidelik op te hef, gegrond op die navorsing en advies van kenners en wetenskaplikes.

Vlak 4 van vyf vlakke van bedreiging en gereedheid word op 1 Mei in werking gestel met winkels wat meer ware, waaronder sigarette, sal kan verkoop. Daar sal meer bewegingsvryheid wees, hoewel steeds geen groepaktiwiteite nie en geen ritte oor provinsiale grense nie. Myne sal stadigaan toegelaat word om weer te werk.

Maar as die snelstygende sterftesyfer aan Covid-19 van die laaste paar dae 'n aanduiding is, kan ons dalk lank in dié fase bly. Drank, klere, hardeware, boeke (ja, boeke!) en kitskos sal eers in vlak 3 te koop wees. Vlak 3 word getipeer as dat daar 'n “matige virusverspreiding en matige gereedheid” is. Ons is ver daarvandaan...