Welkom in die nuwe wêreld van werk

HET jy dit al gewaag om terug te gaan kantoor toe? Die skuif na vlak 3-beperkings beteken jy mag dit waarskynlik doen, maar het jy die moed daarvoor bymekaargeskraap? Kollegas het waarskynlik foto's van jou leë kantoor op die werk se WhatsApp-groep geplaas, waar die enigste oorblywende lessenaars troosteloos glim in die enorme leegte van kantoorspasie wat in die gesogte Sandton R200/m² kos. Dit voel onheilspellend. 

Almal wat terug is by die werk dra maskers, en wanneer mense wel met mekaar praat, is daar kennisgewings wat hulle herinner om minstens 1.5 meter weg te staan en dat daar net een mens op 'n slag in die kombuis moet wees. Oral staan bottels ontsmettingsmiddel met 70% alkohol in.

Die kraan in die mans se badkamer werk nie. Niemand wil die loodgieter bel nie. Hoe minder mense daar in die gebou kom, hoe beter. Jy het nog nooit gesien dat Marc-met-'n-c sy hande was nie — maar nou dink jy dat dit jou dood sal beteken as jy aan die deurhandvatsel vat in 'n badkamer waar nie 'n enkele kraan werk nie. Jy wonder of Marc al sy hande begin was het. Werk Marc selfs nog hier?..