Planmaker in Kanada tot die redding van wanhopige SA Covid-gestrandes

TERTIUS MYBURGH werk en woon die afgelope ses maande in Moncton in New Brunswick in die suidooste van Kanada. Hy was sy lewe lank in Suid-Afrikaanse lugvaart betrokke en nou beoefen hy sy passie daar in Kanada.

Pas nadat grense toegemaak en vlugte opgeskort is, het hy ’n noodoproep ontvang van Klaus Konig, sy destydse skoolhoof en tans hoof by Helpmekaar Kollege in Johannesburg: Konig, sy suster, Petra van der Merwe, en Myburgh se oudwetenskaponderwyseres, Theresa Rossouw, was saam met nog vyf Suid-Afrikaners in Mianmar gestrand. Hulle het die land se tempels gaan bekyk toe die pandemie hul planne gekortwiek het.

Mianmar was nie op die lys van plekke waar die Suid-Afrikaanse departement van internasionale betrekkinge en samewerking (Dirco) of lugdienste met repatriasie kon help nie...