Ploeterende Boris Johnson in die poef by sy eie binnekring

MINDER as 'n jaar sedert Boris Johnson premier van Brittanje geword het, is daar so 'n gemor oor sy chaotiese leierskapstyl dat senior politici in die binnekringe van die Konserwatiewe Party meen hy sal “dalk moet gaan". 

Dis veral die laaste twee weke dat sy hantering van die Covid-19-pandemie – en aanhoudende gejok en verbreekte beloftes – Tory-LP’s laat kla het dat sy swakhede die party erge skade aandoen en dat hy sy slag verloor het. Soos  een minister glo gesê het: Alles het nou in 'n bol poef verander (effens meer beskaafd en in Engels, natuurlik, maar dis die strekking). 

Dié stories kom nie van Johnson se vyande nie. Dit kom van onder andere die Mail on Sunday (https://www.dailymail.co.uk/news/article-8443851/DAN-HODGES-Watch-Boris-Tory-MPs-starting-think-unthinkable.html) se Dan Hodges, 'n politieke rubriekskrywer wat Johnson reeds ondersteun sedert sy kandidaatskap vir burgemeester van Londen. Die Mail on Sunday self is 'n pro-Brexit- en Tory-mondstuk. Dit word ook op die Tory-webblad Conservative Home (https://www.conservativehome.com/) verkondig. En dit kom van die joernalis en oudredakteur Rod Liddle, wat gereeld in die Spectator (https://www.spectator.co.uk/article/does-anyone-think-boris-has-handled-this-well) uitvaar teen sogenaamde libtards en die establishment.   ..