Mosambiekse insurgente, huursoldate en die stryd om Mocímboa da Praia

DIT was ’n verrassingsaanval uit die militêre teksboek wat Saterdagoggend net voor dagbreek die inwoners van Mocímboa da Praia in die verre noorde van Mosambiek wakkergeskud het. Grofgeskut, pantserkarre, strategiese regeringsgeboue in die dorp as teikens en les bes, die geratel van swaarkaliber-masjiengewere was alles deel van dié aanval wat die inwoners die bosse en met bootjies die see in laat spaander het.

Ironies is dié fynbeplande aanval geloods deur ’n skaduagtige en ekstremistiese Islamitiese groepering bekend as Al Sunnah wa Jama-ah (ASWJ), wat normaalweg eerder daarvoor bekend is dat hy gehuggies met pangas aanval en van hul slagoffers onthoof.

Saterdag se aanval op een van die sleutelhawens slegs sowat 60 km suid van Afungi was vermoedelik deels daarop gemik om juis beheer oor die stad te verkry. Dit is by Afungi waar die land se biljoen dollar se vloeibare gas uit die see gepomp en gestoor gaan word. ASWJ se aanvalle het sowat vier jaar gelede begin kort nadat die gasvonds bekendgemaak is...