Mojo Motau: Die oudgeneraal wat ANC-spioenspoke en ’n muitery-stankie opjaag

MAOMELA Moreti “Mojo” Motau se knaende eise en aantygings wissel van die ondermaanse tot die outoritêre. Die ANC se nasionale uitvoerende komitee (NUK) moet ontbind word omdat hulle die “handpoppe van neo-liberalisme” geword het, sê hy. Plaaslike verkiesings moenie plaasvind nie en onverkose komitees moet aan die bewind kom. Die grootste vyand van die ANC is in eie boesem. Pres. Cyril Ramaphosa self is “gekompromitteer" en moet skoert uit die NUK om die ANC te “red" – en so ook onder andere Gwede Mantashe, Tito Mboweni, Zweli Mkhize, Derek Hanekom en Pravin Gordhan. 

Dié aanbevelings en aantygings, saam met eise dat die apartheidspioene in die ANC ontbloot moet word, word volgens Motau “namens die kaders" gedoen. Motau en sy ANC-nasionaliste en -kaders is wel net 'n faksie binne die faksies van die ANC: Hy kan skaars 'n flentergat 50 van die “kaders" bymekaarskaap op 'n slag.

Waarom dan het ANC-swaargewigte soos oudpres. Thabo Mbeki, Mantashe en die adjunk-sekretaris-generaal, Jessie Duarte, al in die openbaar erkenning gegee aan Motau deur na hom en sy aansprake te verwys?..