Putin moet kies: ’n gebroke Oekraïne of sy eie gebroke ego

DIE publiek het lanklaas 'n oorlog met sóveel passie en entoesiasme gevolg as die inval van pres. Vladimir Putin se magte in Rusland se buurland aan sy westelike flank. Of die VSA óf die lande van die Noord-Atlantiese Verdragsorganisasie (Navo) verwag het dat Putin tot aksie sou oorgaan, is nog 'n kwessie van debat. Die wedersydse onmin tussen die twee lande duur immers al vir minstens die afgelope agt jaar voort.

Putin het reeds teen die einde van 2021 met 'n magsopbou aan die oostelike grens van Oekraïne begin. Zelensky se aspirasies om lid van Navo te word en Navo se planne om sy invloedsgebied nader aan Putin se drumpel uit te brei het die Russiese leier duidelik vasberade gelaat om dit teen te staan.

Die VSA en Navo het moontlik juis dié vasberadenheid onderskat, want strydig met wat hulle einde laasjaar net as 'n geratel van swaarde deur Putin afgemaak het, het Rusland op 24 Februarie Oekraïne binnegeval...