Alexei Navalny, die Kremlin se stommerike en die Novichok-komplot

DAAR is gerugte dat hy na strafkolonie nommer ses (IK-6) in die dorp Melekhovo geskuif gaan word, waar gevangenes se vingernaels uitgetrek word. Ten minste, sê die Russiese aktivis Alexei Navalny, sal hy dan ’n verskoning hê om ’n byderwetse emoji te gebruik. En dan plak hy summier ’n emoji van vingernaels wat met rooi naellak geverf word op die tweet.

Dis kenmerkend van die man wat só deur Vladimir Putin gehaat word dat die Russiese president nie eens sy naam in die openbaar wil noem nie: Wrang, asof hy niks te ernstig opneem nie, ’n bietjie arrogant, braaf en veral deeglik bewus van hoe hy maksimum impak op sosiale media kan hê. 

Navalny, waarskynlik dié belangrikste opposisie-politikus in Rusland en Putin se prominentste en mees charismatiese teenstander, tweet sporadies vanuit aanhouding in vermoedelik die IK-2-strafkolonie oos van Moskou. Sy woordvoerder en assistent wat self deur Russiese owerhede gesoek word, Kira Yarmysh, skryf in reaksie op haar Twitter: Vergrype en marteling kom in baie Russiese tronke voor, maar IK-6 is ’n “monsteragtige plek selfs gemeet aan sulke waansinnige standaarde”...

Deel