Belydenis van ’n oudsosialis

Dagsê vriende

In my jeug was ek nogal aangetrokke tot die basiese filosofie agter sosialisme: ’n stelsel waar almal ’n gelyke geleentheid het om in ’n land se welvaart te deel; ’n klem op menswaardigheid en solidariteit eerder as geldsug en materialisme.

Teen die vroeë 1980’s was ek oortuig dat my land se ideologie van apartheid-kapitalisme uit die bose was. Ek wou gaan ervaar hoe die lande werk wat die bevrydingsbeweging gesteun het, en in 1983 het ek in Oos-Berlyn gaan woon. Ja, in die Duitse Demokratiese Republiek, ses jaar voor die Muur geval het...