Goeie donder, dis Donderdag!

Dis Donderdag en die naweek is in sig. Jy kan jou hand uitsteek en daaraan raak. Teen Vrydag is die naweek amper al weer ’n spikkel in jou truspieël. Uitsien is dikwels beter as belewenis.

Ek leef my lewe teen fast-forward-spoed. Die oomblik suis verby. Ek gaan haal die bobbejaan agter bult, en die buit. Ek verlang na jou voor jy nog weggegaan het. Teen Vrydag rou ek reeds oor einde van naweek, want as iets eers begin het, is dit so te sê verby. Maar Donderdag is blink, perfek en vol belofte. Die eerste bladsy van ’n kraaknuwe boek.

Op ’n Maandag gaan almal op dieet en besoek die gim. Geen sjokolade of rooiwyn vandag of ooit weer nie. Teen Donderdag het almal opgegee of vrede gemaak met hulle situasie, want ons leef met ’n helse lot pyn in hierdie land, soos in elke land ter wêreld. Óf dit, óf jy het so mooi uitgehou met jou onmenslike regime dat jy darem seker ’n beloninkie verdien?

Terwyl ek hierdie skryf, is dit natuurlik Woensdag, die dag waarvan ek die minste hou. Woensdag is so gemiddeld. Die week raak te lank en tog voel die naweek nog oneindig ver. Maar; môre is Donderdag: so blitsig kan die landskap verander. Ek hou my oë op die horison, soos my persoon wat laasnag uit ’n diepe slaap regop kom met haar hand bokant haar oë soos ’n verspieder, met die ander hand se voorvinger wat in die verte wys, en duidelik sê: “Daardie carb-goedjies!” Ek sien visioene van die happies wat jy by boekbekendstellings kry wat ek bakpoeierbommetjies noem en wat my laat opswel soos ’n koei wat toegang gekry het tot die lusernland. Ek weet om nie in te meng in haar gekompliseerde droomwêreld nie, en sy gaan lê en slaap verder. 

Donderdag is op pad na opwindende bestemmings – Thursday’s child has far to go, lui die ou gediggie. 

Ek is op ’n Vrydag gebore, sesuur die oggend – gereed vir die naweek, en die pas is aangegee vir die res van my lewe: Daag altyd vroeg op vir alles. Friday's child is loving and giving, glo.

Hierdie daaglikse patrone van uitsien na en opsien teen is vasgelê toe ek skoolgegaan het – daardie lang jare van uiterste verveling – en toe ek daagliks in ’n kantoor moes gaan werk. Nou lyk alles anders: Ek werk dwarsdeur die naweek, met groot vreugde, en skep hier en daar op die ingewing van die oomblik ’n Saterdag.

Donderdag is genoem na die god van donder, Thor, en word gerig deur die mees invloedryke planeet, Jupiter – daarom word dit allerweë as gelukkig beskou.

Groot dinge het op Donderdae gebeur. Volgens Douglas Adams se The Hitchhiker’s Guide to the Galaxy het die Vogons Planeet Aarde op ’n Donderdag opgeblaas. En op ’n Donderdag in 1752 het Benjamin Franklin sy beroemde eksperiment gedoen wat bewys het dat weerlig en elektrisiteit een en dieselfde ding is.

Gryp jou Donderdag en maak elektrisiteit. 

Terloops, ek kon nie onthou wat Sondag se kind was nie. Ek het gaan kyk en my maggies, sy is familie: And a child that's born on the Sabbath day Is fair and wise and good and gay.

III. Always for the First Time

We tell our stories of war like stories
of love, innocent as eggs.

But we will meet memory again
at the wall around our city,

always for the first time.

− Gabeba Baderoon

(Uit: “War Triptych: Silence, Glory, Love”, The Dream in the Next Body)

♦ VWB ♦

NEEM DEEL AAN DIE GESPREK: Gaan na heel onder op hierdie bladsy om op hierdie artikel kommentaar te lewer. Ons hoor graag van jou!