Ek sien ’n nuwe Memel kom, ’n landskap nuut en vry

NADEMAAL ek op kort kennisgewing ingestem het om my nuwe kollega prof. Pudenda von Hartswater met die skryf van haar intreerede as hoogleraar in djenderstudies aan ons universiteit te help, het sy my ’n paar weke later uitgenooi om haar te vergesel op ’n kort studietoer na die Vrystaat.

Ek het dadelik ingestem, want Pudenda se uitbeeldings van haar geleefde ervaring van die rol wat John Deere se 32-ry-planter op die neerdrukkende vestiging van die patriargale hegemonie via herhaalde vergestaltings van geometries onvanpaste mikrogeweld op Vrystaatse landelike kleinboere gehad het – en trouens steeds het – is legendaries in progressiewe akademiese kringe. Hoe kon ek ’n kans laat verbygaan om dié weergalose navorser in aksie te sien?

En was dit nie ’n plesier nie! Reeds op die eerste oggend van ons toer het sy my op ’n mielieland digby Memel mateloos beïndruk met onder meer die sensitiewe wyse waarop sy ’n opstandige plaaslike kleinboerin oortuig het van die etiese en morele meerderwaardigheid van die meervoudigekeuse-vraelys in kwalitatiewe navorsing vis-à-vis enigiets wat die niksvermoedende subjek aan die bedrieglike skyn van vrye keuse onderwerp...

DEEL