Kos gee uitdrukking aan wie ons is, of ons nou ons maaltye deel waar ons om ’n knus kombuiseiland bymekaar is, op die stoep braai of by ’n formele eetkamertafel aansit. En om kos te skep is ’n manier om liefde te betoon aan die mense met wie ons ons kulinêre meesterstukke deel.
Vir die jongste aflewering van Exclusive Books se jaarlikse Tasty Reads-veldtog, wat SA kookboeke en die sjefs daaragter in die kollig plaas, het hierdie boekverkoper ’n bietjie pret gehad met woorde wat smulpape gebruik. Die ietwat geykte uitdrukking “Local is lekker” is op sy kop gekeer. Deur die frase “Local is nié lekker nie” te gebruik, hoop Exclusive Books dat dit die gesprek aan die gang sal kry, nuuskierigheid sal prikkel en mense sal fassineer.
Die idee daaragter is om plaaslike kookkuns te herdefinieer as meer as die alledaagse “lekker”. SA geregte is aanloklik, verslawend, heerlik, geurig, smullekker, pikant en propvol geur.
Die keuse van titels van Tasty Reads gee die konsep van ’n perfekte gereg weer – noukeurig gekose bestanddele met lewendige geure wat elkeen die volgende komplementeer en aksentueer om ’n gebalanseerde bord te verseker.
Omdat September Erfenismaand is, maak dit sin om sowel erfeniskos as kosstyle te vier, asook die neigings wat aan internasionale kospersepsies vorm gee.
