Dodelike bendebloedbad

Kaapstad is in die greep van ’n bendebloedbad wat dreig om die Moederstad in die wêreld se moordhoofstad te omskep. Vroeër vandeesmaand is 62 moordlyke binne ’n tydperk van 54 uur by verskillende lykshuise in die stad afgelewer, en kort daarna is ses lede van die polisie se anti-bende-eenheid in ’n voorval geskiet.

Polisiekorrupsie en twis tussen die eenhede wat dié euwel moet beveg, lei daartoe dat bendes koning kraai en die lyke ophoop.

Die ondersoekende Kaapstadse joernalis Caryn Dolley fokus die afgelope ses jaar op bendegeweld en -aktiwiteite in hierdie stad, en haar nuwe boek, The Enforcers: Inside Cape Town’s deadly nightclub battles, verlig dié verdorwenheid soos nog selde vantevore. Haar boek bewys ook dat die dae van die “nommers” wat tot die sogenaamde Kaapse Vlakte beperk was, lankal verby is. ..