’n Verwoerd breek weg van ‘tradisionele Afrikanerwaardes’

DIT gee die mense nuwe hoop dat ons tog met mekaar kan saamleef, het talle mense gesê wat Wilhelm Verwoerd geluk gewens het dat hy as ANC-lid op ’n ANC-vergadering in Parow opgetree het. Atleetskraal en met ’n profiel wat sterk aan sy oupa herinner, is hy nog effe verbluf oor die opslae wat sy bewoë bydrae tot die ANC se eerste aanslag op tradisievaste Afrikanergebied gemaak het. Dit was ’n simboliese vergadering, sê hy, en hy was as simbool daar. Dit besef hy. Want as gewone lid van die ANC, sonder mandaat van enige organisasie om hulle te verteenwoordig, was dit sy familienaam wat gemaak het dat die mense van Hanoverpark en Ravensmead hom gevra het om te praat.

En die vrae en debatte wat sy deelname tot gevolg gehad het, is presies wat hy graag as filosoof (hy is filosofie-lektor aan die Universiteit Stellenbosch) wil bevorder. Dat mense wegbreek uit ou identiteitslyne getrek deur taal, skool en kerk en ’n slag krities vra waaroor Afrikanerskap, geregtigheid, demokrasie en sulke dinge gaan. Ook dat mense betrokke raak, verantwoordelikheid aanvaar vir hul burgerskap. Meedoen, eerder as net terugsit en vat wat die leiers opdiep.

Wegbreek van ‘Afrikanerwaardes’..

Deel