Omdat ons nie oor naweke inent nie, is SA nou met 1.3 miljoen doserings agter

SUID-AFRIKA is in ’n wedloop teen tyd. Soos die Covid-vlae kom en gaan en nuwe variante na vore kom, is dit nou duideliker as ooit tevore dat daar net een roete uit die gemors is waarin ons onsself bevind, en dit is deur inenting. En wat dit betref, is daar goeie én slegte nuus.

Die goeie nuus is dat al twee entstowwe in die land, Pfizer en Johnson & Johnson (J&J), blykbaar sterk beskerming (https://www.news24.com/news24/southafrica/news/jj-and-pfizer-vaccines-effective-against-delta-variant-health-experts-20210702) teen die Delta-variant bied wat die derde vlaag dryf. As jy dus reeds ingeënt is en ’n immuunreaksie ontwikkel het, gewoonlik so twee tot vier weke ná inenting, is dit onwaarskynlik dat jy ernstig siek van Covid sal raak.

Die ander goeie nuus is dat entstofaanvaarding met verloop van tyd verhoog. In ’n vroeëre ronde van die nasionale studie oor inkomste-dinamika en mobiele coronavirus-opname (Nids-Cram) het ons gerapporteer dat 71% van Suid-Afrikaners in Februarie vanjaar tot inenting ingestem het. In ons jongste resultate, wat pas bekendgemaak is, het dit tot 76% in April/Mei 2021 verhoog...