Om ’n kuiergas te wees is ’n kuns

SOOS 'n warrelwind is allerhande kuiergaste die afgelope vakansie deur ons huise en ons harte. Wanneer kuiergaste vertrek, is dit dikwels wat gashere nié sê nie wat 'n besoek as een van vreugde of verwonding onderskei.

In antwoord op die gaste se “dankie, ons het so lekker gekuier” wanneer hulle wuiwend die pad vat, kom die gasheer se woorde: “Ons is bly julle het dit geniet,” of:  “Ons is dankbaar dat julle lekker gerus het.” Lees jy egter tussen die lyne, ontdek jy wat nié gesê is nie: “Vir ons was dit net dekselse harde werk en baie uitgawes terwyl julle gulhartige gasvryheid geniet het.”

Daarenteen beteken gashere se afskeidsgroete soos: “Ons het julle geselskap geniet en kan nie wag tot jul volgende kuier nie,” of: “Ons koester kosbare herinneringe aan hierdie vakansie en hoop ons sien julle gou weer” duidelik dat hulle ook genot geput het uit die samesyn – geswoeg en uitgawes ten spyt...