Bredie in die somer, glo dit as jy wil

KAAPSE weer in Januarie/Februarie maak sterk manne lam, maar ons is tot met dié skrywe uitgespaar van die versengende hitte. (Hier is 'n aweregse grappie onder gemene Kapenaars: Hulle nooi unsuspecting toeriste om tydens parstyd in die wingerd te kom druiwe pluk. Dit kan ver oor die 40 grade word, maklik, en die arme besoekers dink eers dis groot sports en dan kap hulle om.)

Nie dat sulke helwarm dae ooit ons vrind Michiel daarvan weerhou om peinsend te sit en beplan aan ’n maaltyd vol boontjies, rooiwyn en rookwors nie. Of in sy kombuis te kook aan ’n stew vol varkvleis of pootjies of kalfskop nie.

Bredie is vir Michiel te mak. Hy hou van stew en sop met klonte aartappels en rooikool met appels. Hy hou in die hoogsomer van die soort winterkos wat ons gewoonlik hou vir huilweer, so teen einde Augustus wanneer dit nooit ophou reën nie...