’n Jaar van skuld, rente en inflasie

ONVERWAGSE en ongemaklik hoë inflasie was in baie lande ’n groot besprekingspunt in 2021, hoewel nie juis in Suid-Afrika nie.

Plaaslik was die ekonomiese groeiprestasie beter ondanks ’n rits terugslae. Dit sluit in die ergste jaar tot nog toe van beurtkrag en die Julie-onluste. Saam het dit onder meer gelei tot ’n selfs hoër plaaslike werkloosheidskoers in 2021 vergeleke met 2020, toe die ekonomie met ’n enorme 6.4% gekrimp het. Dit is in teenstelling met van ons vernaamste handelsvennote, waar ’n herstel in ekonomiese groei ’n herstel in indiensname moontlik gemaak het.

Betreffende BBP-groei is die plaaslike eie doele in 2021 versag deur stimulus van die res van die wêreld. Dit het onder meer rekord-lae rentekoerse en uitbreidende staatsbesteding (veral in die VSA) ingesluit wat sterk ekonomiese groei van 5% en meer in groot dele van die wêreld moontlik gemaak het. Die skerp herstel in die wêreld se BBP-groei het op sy beurt bygedra tot die wesenlike styging in hulpbronpryse wat plaaslike uitvoerverdienste en staatsinkomste ondersteun het. Suid-Afrika het ’n onverdiende maar broodnodige en welkome meevaller gekry...