Oppas, DA: Gayton McKenzie kén politiek

Die DA moet bitter versigtig wees dat hulle Gayton McKenzie, leier van die Patriotiese Alliansie, nie hanteer soos die Demokrate oudpres. Donald Trump hanteer het nie. Gayton McKenzie was Maandagaand ’n gas op In gesprek met Lourensa Eckard op kykNET. Hy het onder meer gesels oor die veelpartykoalisie, die mosie van wantroue teen die huidige burgemeester van Johannesburg, Kabelo Gwamanda van Al Jama-ah, en oor die manier waarop die DA hom en sy party hanteer.

McKenzie, wat net so terloops ongelooflike goeie televisie maak, was geesdriftig en vol oortuiging. Dit was asof hy álles glo wat uit sy mond uit kom.

Deur die loop van die week is daar heelwat klappe na McKenzie se kant toe uitgedeel, alles uit die hand van die DA. Op ’n vraag oor die plakkate wat mense van die DA oor McKenzie en sy party maak – onder meer een waar pres. Cyril Ramaphosa die poppemeester en McKenzie sy pop is – antwoord McKenzie spottenderwys dat sy geliefdes die dag wanneer hy doodgaan foto’s vir sy begrafnis-slideshow by die DA kan gaan vra. Hy meen hulle het so baie foto’s van hom; hulle is Gayton-mal (hy wou Gayton-befok sê, maar is vooraf gevra om nie enige kragwoorde op die program te gebruik nie).

Die DA meen ook ’n stem vir die PA is ’n stem vir die ANC, en dat die PA nie vertrou kan word nie. McKenzie hou egter vol dat die DA nie werklik koalisievennote wil hê nie. Hulle wil mense hê wat hulle kan domineer. As McKenzie en die PA volgens die DA nie vertrou kan word nie, hoekom sê Herman Mashaba van ActionSA en Corné Mulder van die Vryheidsfront Plus dan nie dieselfde van die PA nie, wou McKenzie weet. McKenzie like nie net vir Mulder omdat hy ’n eerlike en opregte leier is nie, maar Mulder se vrou maak blykbaar ook die beste aartappelslaai in Suid-Afrika.

Leser, you can’t make these things up, haha. (Vinnige reklame vir die program waarby ek betrokke is: Skakel Maandagaande om 20:30 in op kykNET vir In gesprek met Lourensa Eckard. Ons episodes is ook op DStv Catch Up beskikbaar.)

Terug na my inleidende punt: Die Demokrate in Amerika het Donald Trump en sy ondersteuners érg onderskat. Hillary Clinton het by geleentheid in 2016 gesê Trump se ondersteuners is ’n “basket of deplorables”. Deplorables?! Is die Afrikaanse vertaling “betreurenswaardiges”? Hóé sê enigiemand so iets van mense? Mense wat in iemand ’n uitweg, ’n antwoord, ’n oplossing gesien het. Of ons met Trump en sy ondersteuners saamstem, is nie hier – nes met McKenzie – ter sprake nie. Die feit van die saak bly: Hy’t gewen en sy’t verloor. Myns insiens was haar ego een van die deurslaggewende faktore wat haar die verkiesing gekos het. Sy was te gemaklik.

Mag die DA nie in daai gemaksone inbeweeg waar hulle een persoon of een party afmaak as betreurenswaardig nie. Op 29 Augustus 2023 tweet Leon Schreiber:

“This loser spends all night begging to be let into a party he was never invited to. After the whole street laughs at him, he comes out the next day and says he never wanted to go to the party in the first place […]. Gaan speel met jou ANC-maatjies en bly weg, vuilgoed!”

Dit nou ná afloop van ’n video wat McKenzie geplaas het waarin hy sê dat hy die deure vir die DA toegemaak het. Hulle moenie by die PA kom aanklop wanneer dit by volgende jaar se verkiesing kom nie.

“Vuilgoed” en “deplorable” klink baie dieselfde. Ligloop, Leon.

Die Patriotiese Alliansie en Gayton McKenzie gaan nêrens heen nie. Kyk na die tussenverkiesings. Die PA se steun hét op plekke gegroei. Weereens, jy hoef nie met ’n party se politiek, ideologie en dies meer saam te stem nie; maar let’s maar now call a spade a spade: McKenzie kén politiek, hy ken die lewe, en, baie belangrik: Hy ken sy mense.

Die Patriotiese Alliansie bied ’n tuiste vir bruin kiesers op die platteland, die Vlakte, en die dorpies wat in die groter skool van politiekery vergeet word.

Uit: ballade van ’n wasdag

ek en my ma is wasgoed wat sy
dophou deur die kombuisvenster was-
goed wat sing-sing huil
Ma sê altyd: dit is nie sy tyd nie
dit is nie sy tyd nie
sy het nie  meer tyd nie
so staan sy gebukkend oor die was-
goed en spoeldraai met skuim en seperig
sonder ophou was sy Boeta se ongeluksklere

– Jolyn Phillips
(Uit: radbraak)

♦ VWB ♦

NEEM DEEL AAN DIE GESPREK: Gaan na heel onder op hierdie bladsy om op hierdie artikel kommentaar te lewer. Ons hoor graag van jou.